ഇന്നെന്റെ അറുപത്തിഏഴാമത്തെ പിറന്നാളാണ്.
 വൈകിട്ട് ഒരു നേഴ്സ് എല്ലാവരോടും പണം പിരിച്ചു വാങ്ങി എന്നെക്കൊണ്ട് മുറിപ്പിച്ച ഒരു ബ്ലാക്ക് ഫോറസ്റ്റ് എമ്പക്കം എനിക്ക് തികട്ടി വരുന്നുണ്ട്.

ആദ്യത്തെ ഇരുപത് വർഷങ്ങൾ അമ്പലത്തിലും പള്ളിയിലും പോയി
പിന്നീടുള്ള കുറെ പിറന്നാളിൽ രാവിലെ മുതൽ രാത്രി വരെ കട്ടിലിൽ കരഞ്ഞു കരഞ്ഞു കഴിച്ചു കൂട്ടി
ചില പിറന്നാളിൽ പഴയ കാമുകരുടെ ഫോൺ വിളികൾ
ചിലതിൽ ആരോടും പറയാതെ എവിടേക്കോ പോകുന്ന യാത്രകൾ
മഴ നനഞ്ഞു നടന്ന ദിവസങ്ങൾ

ഇനി പിറന്നാള് പത്രക്കോളത്തിൽ വരുന്ന ഒരു തിയതി മാത്രമാവും
പല വട്ടം തർക്കിച്ചു വില പേശി നീട്ടിക്കൊണ്ടു പോയ മരണം ഇനി ഒരു ഉച്ച നേരത്ത് വെറുതെ അങ്ങ് കടന്നു വരും
തണുത്ത കൺപോളകൾ അടക്കുമ്പോൾ എന്റെ പ്രിയപ്പെട്ട നേഴ്സ് ദുഃഖം കലർന്ന വിറയലോടെ ഞാൻ അവരുടെ കുഞ്ഞിന് കൊടുത്തയച്ച ചോക്കലേറ്റ് കളെ പറ്റി ഓർക്കും
കൂടെയുള്ള മറ്റു വൃദ്ധർക്ക്‌ 2 ദിവസം വേദനയാവും
പിന്നെ എന്റെ ഇൗ കട്ടിലിലേക്ക് അവരിൽ ഒരാൾ ചേക്കേറും

എനിക്ക് മാത്രം ഭയം ഉള്ള ഒരു നിമിഷം ഒളിപ്പിച്ച ജന്മദിനവും മരണ ദിനവും എന്നെ കാത്ത് എവിടെയോ നിൽക്കുന്നു